“O‘zbekiston – 2030” strategiyasi: Malakali sportchilar ko‘pligi millat salomatligini belgilashda muhim omildir

  • Korporativ Aloqalar Bo'limi
  • 160

Qadimdan har bir oilada,  mahallada yangi avlod farovonligini ta’minlash, yoshlarga yaxshi ta’lim-tarbiya berish, ayni paytda o‘g‘il-qizlarni munosib voyaga yetkazish eng muhim masala sanalib kelgan. Amalga oshirilgan va oshirilayotgan keng qamrovli islohotlar boshqa sohalar singari jismoniy tarbiya va sport tizimida ham yangicha tamoyillar va muvaffaqiyatlar yuz ochishiga omil bo‘ldi.

“O‘zbekiston – 2030” strategiyasini 2023 yilda sifatli va o‘z vaqtida amalga oshirish chora-tadbirlari to‘g‘risida”gi qarorida keltirib o‘tilganidek, Yangi O‘zbekistonni barpo etish bo‘yicha  xalqimiz xohish-irodasini ro‘yobga chiqarish, har bir fuqaroga o‘z salohiyatini rivojlantirish uchun barcha imkoniyatlarni yaratish, sog‘lom, bilimli va ma’naviy barkamol avlodni tarbiyalash bugungi davrning muhim vazifalaridan biri sanaladi.  

Mazkur qarorda mamlakatimizda o‘tkaziladigan ommaviy sport tadbirlarini tashkil etish orqali 2030 yilgacha yoshlar qamrovini 8 milliondan oshirish, sport bilan shug‘ullanishga jalb qilingan aholi ulushini 36 foizga yetkazish, turli musobaqa va turnirlarda ishtirok etayotgan yoshlar orasida razryadli va unvonli sportchilar sonini 25 ming nafarga yetkazish vazifalari belgilangan.  

Yoshlar siyosati va sport vazirligi ma’lumotiga ko‘ra, o‘tgan davr mobaynida yurtimizda ommaviy sportni rivojlantirish borasida qator ishlar amalga oshirilmoqda. Xususan, mahalla yoshlari orasida “Besh tashabbus olimpiadasi”, ta’lim muassasalarida “Talabalar ligasi”, aholining barcha qatlamlarini qamrab olayotgan “Yangi nafas” yugurish musobaqalari yo‘lga qo‘yilgani, yurtimizdagi mavjud sport turlari bo‘yicha birinchilik, chempionat, xalqaro turnirlar o‘tkazilishi “O‘zbekiston – 2030” strategiyasining maqsadlari bilan mushtaraklik kasb etmoqda.  

Bugungi kunda hududlardagi sport-ta’lim muassasalarida, jismoniy tarbiya-sog‘lomlashtirish va sport inshootlarida iqtidorli yoshlarni ko‘paytirish va ularning sport-ta’lim muassasalariga yo‘naltirish, sport turlari bo‘yicha o‘qish va shug‘ullanish jarayonini doimiy nazoratga olish, qo‘llab-quvvatlash maqsadida Yoshlar siyosati va sport vazirligi tizimida “ERP-SPORT” – yagona elektron boshqaruv tizimi ishga tushirilgani ayni muddao bo‘ldi.  

Mazkur tizim razryadli va unvonli sportchilarning aniq raqamlarini, ularning erishayotgan natijalari bo‘yicha monitoring ishlarini samarali olib borish imkonini bermoqda.  

Ayni holatni hududlar kesimidagi taqsimotiga nazar tashlasak, Qoraqalpog‘iston Respublikasida 6 ming 69, Andijon viloyatida 10 ming 296, Buxoro viloyatida 9 ming, Jizzax viloyatida 6 ming 617, Qashqadaryo viloyatida 5 ming 933, Navoiy viloyatida 7 ming 404, Namangan viloyatida 8 ming 775, Samarqand viloyatida 9 ming 980, Surxondaryo viloyatida 9 ming 211, Sirdaryo viloyatida 5 ming 992, Toshkent viloyatida 11 ming 994, Farg‘ona viloyatida 11 ming 101, Xorazm viloyatida 5 ming 398, Toshkent shahrida 3 ming 862 nafar. Bundan ko‘rinib turibdiki, ommaviy sportning rivojlanish tamoyili qaysi maskanda qay darajada rivoj topayotganini anglash mumkin, albatta. Ushbu ko‘rsatkichlar qaysi sport turlariga tegishliligi, malakali sportchilar xalqaro va ichki musobaqalardagi natijadorligi esa boshqa masala ekanini ta’kidlagan holda aytish lozim, Olimpiya va Osiyo o‘yinlari, jahon va qit’a chempionatlaridagi yutuqlar aynan mazkur jihatlar orqali qo‘lga kiritilishi ahamiyatlidir.  

“Ommmaviy sportni rivojlantirish, tegishli sport turlarini qo‘llab-quvvatlash” to‘g‘risidagi qarorning tub zamirida ham iqtidorli yoshlar safini kengaytirish asnosida millat genofondini sog‘lomlashtirish, Yangi O‘zbekistonning xalqaro maydondagi obro‘-e’tiborini yanada oshirish maqsadi mujassam. “O‘zbekiston – 2030” strategiyasida keltirilganidek, bu harakatlar kelgusi besh yillikda mamlakatimiz aholisining jismoniy faollik darajasi 2 barobar oshirishga erishilishiga poydevor yaratadi.  

Toshkent arxitektura-qurilish universiteti
O‘zbek tili va adabiyoti kafedrasi
katta o‘qituvchisi (PhD) 

Aripova Vasila Baxtiyarovna