Seysmik xavfsizlikni ta'minlash ishlari jadallashtirilmoqda

G’.O’.Mavlonov nomidagi Seysmologiya institutida O’zbekiston Respublikasi Fanlar akademiyasi Vitse-prezidenti S.Mirzayev raisligida O’zbekiston Respublikasi Prezidentining 2023-yil 16-maydagi “O’zbekiston Respublikasi aholisi va hududining seysmik xavfsizligini taʼminlash tizimini yana-da takomillashtirishga oid qo’shimcha chora-tadbirlar to’g’risida”gi PQ-158-son qarori ijrosini samarali tashkil etish, jumladan, kuchli zilzilalar taʼsirida Toshkent shahrining talafot darajasini iqtisodiy baholash imkonini beruvchi raqamlashtirilgan simulyatsion model yaratishga bag’ishlangan yig’ilish bo’lib o’tdi. Tadbirda Toshkent Arxitektura-qurilish universiteti Strategik rivojlantirish bo’yicha 1 prorektor (rektor v.v.b.) B.Tulaganov,  qurilish va uy-joy kommunal xo’jaligi vazirligi,  M.T.O’rozboyev nomidagi Mexanika va inshootlar seysmik mustahkamligi instituti va boshqa tashkilotlar mas’ullari qatnashishdi. Joriy etilishi ko’zda tutilgan simulyatsion model  Toshkent shahrida qurilgan barcha bino va inshootlarning seysmobardoshlik bo’yicha maʼlumotlar bazasini yaratish va ularni GIS platformasiga joylashtirishni va bu orqali maʼlumotlar bazasidagi bino va inshootlarning seysmik jihatdan zaifligini va ularning kuchli zilzilalarda to’la shikastlanish qiymatlarini aniqlash imkonini beradi. Shuningdek, loyiha doirasida Toshkent shahri hududida sodir bo’lish ehtimoli yuqori bo’lgan zilzila o’choqlarining seysmik xavfini, kuchli zilzilalar sodir bo’lgan taqdirda shaharda qurilgan bino va inshootlarning buzilish darajasini baholash bo’yicha dastur ishlab chiqiladi. Yig’ilishda seysmik xavfsizlikni taʼminlash tizimini yana-da takomillashtirish maqsadida olib borilayotgan o’zaro hamkorlik natijalari, shuningdek, kelgusida amalga oshirilishi lozim bo’lgan vazifalar to’g’risida o‘zaro fikr almashildi.