Bo‘lim asosiy vazifalari va funksiyalari:

    Talabalarga mehnat to‘g‘risidagi qonun hujjatlari bo‘yicha maslahat berish, mehnat bozorida mos vakansiyalarni izlash ko‘nikmalarini shakllantirish, ishga joylashish uchun zarur hujjatlar bilan tanishtirish, rezyume tuzish va suhbatdan o‘tish usullarini o‘rgatish.

    Talabalarni kasbga yo‘naltirish maqsadida ilg‘or mutaxassislar va ekspertlarni jalb etish, mehnat bozoridagi mavjud va istiqboldagi holat, sohalar, kasblar va ish beruvchilar to‘g‘risida zamonaviy ma’lumotlar bilan tanishtirish.

    Mehnat organlari, ta’lim muassasalari, manfaatdor idoralar va tashkilotlar bilan hamkorlikda ish o‘rinlari yarmarkalari, “Karyera kuni” tadbirlarini tashkil etish, talabalarning kasbiy qiziqishlarini kuchaytiruvchi amaliy va motivatsion tadbirlarni o‘tkazish.

    Universitetda tayyorlanayotgan mutaxassislar, bitiruvchilarning ishga joylashuvi hamda avvalgi yillardagi bitiruvchilarning mehnat faoliyati bo‘yicha ma’lumotlar bazasini shakllantirish va doimiy yangilab borish, shuningdek, bu yo‘nalishdagi tashkiliy, tahliliy va metodik materiallarni tayyorlash hamda nashr etish.

    Mehnat bozorida marketing tadqiqotlarini muntazam olib borish, bakalavriat yo‘nalishlari va magistratura mutaxassisliklari bo‘yicha bitiruvchilarning kasbiy tayyorgarlik darajasini o‘rganish, ularning ish beruvchilar talablariga muvofiqligini aniqlash.

    Mehnat bozori kon’yunkturasini tahlil qilish orqali bitiruvchilarni oldindan ishga taqsimlash tizimini shakllantirish va amalga oshirish, bitiruvchilar uchun to‘liq ma’lumotlar bankini yaratish (vakansiyalar, ish beruvchilar, geografik joylashuv, talab va taklif nisbatlari asosida).

    Joriy yil bitiruvchilari (ta’lim yo‘nalishlari, mutaxassisliklari, ta’lim shakllari va moliyaviy manbasi bo‘yicha) haqida batafsil elektron ma’lumotlar bazasini yaratish hamda yangilab borish.

    Ishga joylashgan yosh mutaxassislar bilan doimiy aloqalarni yo‘lga qo‘yish, ularning mehnat faoliyati natijalarini o‘rganish, zarur hollarda ularga amaliy-uslubiy yordam ko‘rsatish va maslahatlar berish.

    Yuqori (bitiruvchi) kurs talabalarining kasbiy mahoratini baholash, ish beruvchilar ehtiyojlari bilan taqqoslash hamda fakultetlar va kafedralarga bitiruvchilarning raqobatbardoshligini oshirish yuzasidan amaliy tavsiyalar taqdim etish.

    Turdosh oliy ta’lim muassasalari bitiruvchilari bilan taqqoslab, universitet bitiruvchilarining kasbiy salohiyatini o‘rganish, ustun va zaif jihatlarni aniqlash, fan-texnika taraqqiyoti yutuqlaridan kelib chiqib, mutaxassis tayyorlash sifatini yaxshilash bo‘yicha taklif va tavsiyalar ishlab chiqish.

    Universitet bitiruvchilarining imkoniyatlari va yutuqlarini namoyish etish maqsadida respublika, mintaqaviy va xalqaro ko‘rgazmalar, yarmarkalar, ekspozitsiyalarda ularning ishtirokini ta’minlash.

    Ish beruvchilar bilan tuzilgan shartnomalarga muvofiq bitiruvchilarni belgilangan muddatlarda ishga joylashtirish uchun tegishli bo‘linmalar bilan talabalar qabulini va bitiruvchilarni taqsimlash rejalarini muvofiqlashtirish.

    Universitetning fakultet va kafedralari bilan hamkorlikda davlat granti asosida tahsil olgan bitiruvchilarning uch yillik majburiy ishlab berish jarayonini nazorat qilish, ularning kasbiy faoliyatini rivojlantirish va lavozim pog‘onalarida o‘sishiga ko‘maklashish.

    Talabalar amaliyotini (stajirovkasini) o‘quv rejalarga muvofiq, korxonalar bilan kelishilgan dasturlar asosida tashkil etish, amaliy mashg‘ulotlarni ishlab chiqarish korxonalarida malakali mutaxassislar ishtirokida o‘tkazish va ularni malaka amaliyotining ajralmas qismi sifatida qabul qilish.