Bugun yurtimizda buyuk sarkarda, dono siyosatchi va davlat arbobi Sohibqiron Amir Temur tavalludining 689 yilligi keng nishonlanmoqda. Ushbu muhim sana munosabati bilan ertalabdan Toshkent shahridagi Amir Temur haykali poyiga gullar qo‘yilib, xalqimiz qalbida chuqur iz qoldirgan tarixiy siymoga hurmat bajo keltirildi. Shu bilan birga, ma’naviy-ma’rifiy ruhda boyitilgan tantanali tadbir tashkil etildi. Poytaxtimizning yuragi sanalmish Amir Temur xiyobonida o‘tkazilgan mazkur tadbirda turli sohalarning yetuk vakillari ishtirok etdilar. Jumladan, Oliy Majlis Qonunchilik palatasi deputatlari, vazirlik va idoralar rahbarlari, fan va ta’lim sohasining nufuzli olimlari, keng jamoatchilik vakillari, yoshlar hamda madaniyat arboblari tadbirga tashrif buyurdi. Toshkent arxitektura-qurilish universiteti rektori v.b. B.Tulaganov ham ushbu muhim tadbirda faol ishtirok etib, Amir Temur merosining zamonaviy taraqqiyotimizdagi o‘rniga oid fikr-mulohazalarini bildirdi.