Toshkent arxitektura-qurilish universitetida talaba-yoshlarni kasb-hunarga yo‘naltirish, ularning amaliy ko‘nikmalarini rivojlantirish hamda bo‘sh vaqtlarini mazmunli tashkil etish maqsadida Yoshlar masalalari va ma’naviy-ma’rifiy ishlar boshqarmasi tashabbusi bilan kulolchilik yo‘nalishidagi “Nafislik sari” to‘garagining navbatdagi mashg‘uloti tashkil etildi.
Mazkur to‘garak talaba-yoshlarning ijodiy salohiyatini ro‘yobga chiqarish, milliy hunarmandchilik an’analarini keng targ‘ib etish, ularni mehnat bozorida talab yuqori bo‘lgan kasb va hunarlarga yo‘naltirish hamda bandligini ta’minlashga ko‘maklashish maqsadida yo‘lga qo‘yilgan.
Mashg‘ulot davomida ishtirokchilar kulolchilik san’atining tarixi, loyga ishlov berish usullari, buyumlarga shakl berish, bezak elementlarini yaratish va mahsulotlarni tayyorlashning amaliy bosqichlari bilan yaqindan tanishdilar.
To‘garak a’zolari tajribali mutaxassislar ko‘magida turli xil sopol buyumlar tayyorlash jarayonida o‘z mahoratlarini sinab ko‘rib, amaliy ko‘nikmalarini yanada mustahkamladilar. Yaratuvchanlikka asoslangan mashg‘ulotlar talabalarda sabr-toqat, estetik did, mas’uliyat va ijodiy fikrlash ko‘nikmalarini rivojlantirishga xizmat qildi.
Tadbir davomida talabalarga kulolchilikning nafaqat san’at, balki istiqbolli kasb-hunar yo‘nalishi ekani, ushbu faoliyat orqali o‘z biznesini yo‘lga qo‘yish va daromad manbaiga ega bo‘lish imkoniyatlari haqida ham batafsil ma’lumotlar berildi.
“Nafislik sari” to‘garagi talaba-yoshlarning bo‘sh vaqtini mazmunli tashkil etish, ularning iste’dod va qobiliyatlarini yuzaga chiqarish, milliy hunarmandchilikka qiziqishini oshirish hamda kelajakda raqobatbardosh mutaxassis bo‘lib shakllanishlarida muhim ahamiyat kasb etmoqda.