27-iyun – Matbuot va ommaviy axborot vositalari xodimlari kuni munosabati bilan O‘zbekiston Milliy media birlashmasi tashabbusi bilan tashkil etilgan “OAV haftaligi” doirasida Oliy ta’lim, fan va innovatsiyalar vazirligida “Zamonaviy media: muammo, yechim va istiqbollari” mavzusida ilmiy-amaliy panel sessiya o‘tkazildi.

Tadbirni Oliy ta’lim, fan va innovatsiyalar vaziri Qong‘irotboy Sharipov ochib berdi. O‘z nutqida u so‘z erkinligi, axborotning oshkoraligi va jamiyatda xolis hamda haqqoniy fikrni shakllantirish jarayonida jurnalistlar va ommaviy axborot vositalari vakillarining fidokorona mehnatini alohida e’tirof etdi.

Panel sessiyada sohaning yetakchi mutaxassislari – O‘zbekiston Milliy media birlashmasi boshqaruvi raisi Sherzodxon Qudratxo‘ja, Axborot va ommaviy kommunikatsiyalar agentligi direktori Asadjon Xo‘jaev, Markaziy Osiyo sun’iy intellekt assotsiatsiyasi raisi Vladimir Norov, O‘zbekiston Milliy teleradiokompaniyasi raisi o‘rinbosari Madamin Safarov, O‘zbekiston Jurnalistlar uyushmasi raisi Xolmurod Salimov, Oliy Majlis Qonunchilik palatasi deputati Umida Rahmonova, Mass Media fondi raisi Akrom Fozilov va boshqa mutasaddilar ishtirok etdi.

Sessiya davomida zamonaviy mediadagi muammolar, ularni bartaraf etish yo‘llari hamda sohaning istiqbollari yuzasidan fikr almashildi. Shuningdek, jurnalistika sohasida axborot texnologiyalarining o‘rni, yoshlar media savodxonligini oshirish masalalari va professional malakani mustahkamlash borasida dolzarb taklif va tavsiyalar ilgari surildi.