O‘zbekiston Respublikasi Vazirlar Mahkamasi huzuridagi Biznes va tadbirkorlik oliy maktabi (keyingi o‘rinlarda – Oliy biznes maktabi) Italiyaning Milan shahrida Milan texnika universitetining Oliy menejment maktabi (POLIMI Graduate School of Business) bilan hamkorlikda 2025-yilning 22–26 sentabr yoki noyabr oyida “Raqamli transformatsiya sharoitida biznesni tashkil etish va samarali boshqarish” mavzusida qisqa muddatli kurs tashkil etmoqda.

Mazkur qisqa muddatli o‘quv kursida ishtirokchilar raqamli transformatsiya sharoitida biznesni tashkil qilish, ularni strategik boshqarish, korporativ va loyiha boshqaruvini raqamlashtirish, biznesda sun’iy intellektni qo‘llash, korporativ boshqaruvda ESG-menejment, shuningdek, barqaror rivojlanishning xalqaro standartlari kabi mavzular bo‘yicha amaliy bilim va tajribalarga ega bo‘ladilar. Ishtirokchilar Italiyaning yetakchi kompaniyalariga, xususan EDISON, PIRELLI, ROLD, UNICREDIT tashrif buyuradilar.

Ushbu o‘quv kursi ishtirokchilar uchun yuqori darajadagi tajriba va yangi bilimlarga ega bo‘lish imkonini taqdim etib, raqamli transformatsiya jarayonlarini samarali boshqarish bo‘yicha ilg‘or amaliyotlardan foydalanishga imkon beradi.

O‘quv kursining qiymati (havo yo‘llari chiptalari qo‘shilgan holda) bir nafar ishtirokchi uchun 43 559 000 so‘mni tashkil etadi. Mehmonxona va kunlik xarajatlar ishtirokchini yuborgan korxona yoki ishtirokchi tomonidan qoplanadi.

Mazkur dasturda ishtirok etish uchun nomzodlar Oliy biznes maktabiga murojaat qilishlari mumkin: ird@rgsbm.uz