Sustainability and UI GreenMetric at TAQU

Kampus muhiti va infratuzilma

TAQU Toshkent shahrining Yunusobod tumanida joylashgan bo‘lib, o‘quv binolari, yotoqxona, sport va ovqatlanish obyektlari, ochiq maydonlar hamda yashil hududlardan iborat yagona kampus tizimini tashkil etadi. Ochiq maydon va yashil zonalar ulushi yuqori bo‘lib, bu talabalar va xodimlar uchun qulay ekologik muhit yaratadi. Imkoniyati cheklangan shaxslar uchun pandus, lift va maxsus sharoitlar bosqichma-bosqich joriy etilmoqda.

Energiya va iqlim o‘zgarishi

Universitetda energiya samaradorligini oshirish maqsadida LED yoritish tizimlari, energiya tejamkor maishiy texnika, ventilyatsiyada rekuperatorlar va smart infratuzilma elementlari joriy etilmoqda. Face ID kirish tizimi va ayrim binolardagi “smart building” yechimlari energiya sarfini nazorat qilishga xizmat qiladi. Quyosh panellari kabi qo‘shimcha tashabbuslar “2026–2027 rejasi” sifatida ko‘rib chiqilmoqda

Chiqindilarni boshqarish

TAQUda chiqindilarni saralash qutilari, qog‘oz sarfini kamaytiruvchi elektron platformalar (HEMIS, elektron jurnal) va talabalar ishtirokidagi “Recycling Week” kabi ekologik tadbirlar orqali chiqindilarni boshqarish yo‘lga qo‘yilmoqda. Xavfli chiqindilar (laboratoriya, elektron, batareya) alohida tartibda boshqariladi. QR-kodli monitoring tizimi kelgusi bosqich sifatida rejalashtirilgan.

Suv resurslarini boshqarish

Suvdan oqilona foydalanish maqsadida kampusda suv ta’minoti, yashil hududlarni sug‘orish va suv sarfini nazorat qilish ishlari olib borilmoqda. “Suvni tejaylik — kelajakni asraylik” tashabbusi doirasida talabalar ishtirokida targ‘ibot tadbirlari o‘tkaziladi. Smart suv hisoblagichlari va real-time monitoring tizimi kelgusi bosqichda joriy etilishi rejalashtirilgan.

Barqaror transport

TAQU shahar markazida joylashgani sababli universitetga metro va avtobus orqali qulay yetib borish imkoniyati mavjud. Kampusda piyodalar yo‘laklari, avtoturargoh va nogironligi bo‘lgan shaxslar uchun kirish sharoitlari ta’minlangan. 2026-yil uchun asosiy maqsad — shaxsiy avtomobillarga bog‘liqlikni kamaytirish va velosiped infratuzilmasini rivojlantirishdir

Ta’lim va ilmiy tadqiqotlar

TAQUning ustuvor yo‘nalishi — arxitektura, qurilish, shaharsozlik va muhandislik sohalarida barqaror rivojlanishga oid ta’lim va tadqiqotlarni rivojlantirishdir. Universitetda barqaror arxitektura, energiya tejamkor binolar va ekologik qurilish materiallariga oid fanlar o‘qitiladi. Chongqing University va Bauhaus University Weimar kabi xalqaro hamkorlar bilan aloqalar yo‘lga qo‘yilgan, talabalar esa “Yashil Kampus”, “Recycling Week” kabi jamoatchilik loyihalarida faol ishtirok etadi.

Boshqaruv va raqamlashtirish

Universitet faoliyatida shaffoflik va samaradorlikni oshirish maqsadida HEMIS elektron tizimi, elektron jurnallar, Face ID kirish tizimi va smart auditoriyalar qo‘llanilmoqda. 2026-yilda GreenMetric ishchi guruhini shakllantirish, barqaror rivojlanish siyosatini rasmiylashtirish va yillik “Sustainability Report”ni e’lon qilish rejalashtirilgan.