Toshkent arxitektura-qurilish universitetida talaba-yoshlarni kasb-hunarga yo‘naltirish, ularning amaliy ko‘nikmalarini rivojlantirish hamda bo‘sh vaqtlarini mazmunli tashkil etish maqsadida Yoshlar masalalari va ma’naviy-ma’rifiy ishlar boshqarmasi tashabbusi bilan “Tikuvchilik san’ati” to‘garagining navbatdagi mashg‘uloti bo‘lib o‘tdi.
Mazkur to‘garak talabalarning tikuvchilik yo‘nalishidagi bilim va ko‘nikmalarini oshirish, kasbiy qiziqishlarini qo‘llab-quvvatlash hamda ularni mehnatsevarlik va ijodkorlik ruhida tarbiyalash maqsadida tashkil etildi.
Mashg‘ulot davomida ishtirokchilar tikuvchilikning boshlang‘ich va amaliy bosqichlari, matolar bilan ishlash texnikasi, kiyim detallarini tayyorlash, bichish va tikish jarayonlari bo‘yicha zarur bilimlarga ega bo‘ldilar.
To‘garak a’zolari o‘zlarining mahorat va ijodiy yondashuvlarini namoyon etib, turli buyumlar va kiyim elementlarini tayyorlash jarayonida amaliy tajriba orttirdilar. Mashg‘ulotlar talabalarda aniqlik, mas’uliyat, sabr-toqat va estetik didni shakllantirishga xizmat qildi.
Tadbir davomida ishtirokchilarning kasbiy qiziqishlari yanada mustahkamlanib, ularning mustaqil faoliyat yuritish va tadbirkorlik ko‘nikmalarini rivojlantirishga alohida e’tibor qaratildi.
“Tikuvchilik san’ati” to‘garagi talaba-yoshlarning kasbiy salohiyatini oshirish, ularni zamonaviy kasb-hunar sirlariga o‘rgatish hamda iste’dod va imkoniyatlarini ro‘yobga chiqarishda muhim ahamiyat kasb etmoqda.