2025-yilning 1–3-may kunlari Toshkent shahrida bo‘lib o‘tayotgan “INNOPROM. Markaziy Osiyo” V Xalqaro sanoat ko‘rgazmasi doirasida Ilg‘or muhandislik maktabi faoliyatini tashkil etish bo‘yicha maxsus taqdimot o‘tkazildi. Taqdimot chog‘ida MISiS Fan va texnologiyalar universitetining Olmaliq filiali hamda “Olmaliq kon-metallurgiya kombinati” hamkorligida tashkil etilgan “GeoMetTex” ilg‘or muhandislik maktabini tashkil etish bo‘yicha tajriba o‘rganildi. Unda maktab faoliyatining yo‘lga qo‘yilishi, o‘qishga qabul qilish tartibi, o‘quv jarayonining tashkil etilishi, shuningdek, sanoat hamkori hisoblangan korxona ehtiyojidan kelib chiqib malakali mutaxassislar tayyorlash masalalari yuzasidan batafsil ma’lumotlar berildi. Mazkur taqdimotda Toshkent arxitektura-qurilish universitetining Arxitektura qurilish yo‘nalishi bo‘yicha faoliyat yuritayotgan Ilg‘or muhandislik maktabi (IMM) rahbari, texnika fanlari falsafa doktori (PhD), dotsent Rashidov J.G‘., shuningdek, “Qurilish” fakultetining  ingliz tili guruhlari talabalari va “Bino va inshootlar qurilishi” kafedrasi magistrantlari ishtirok etdi.