Toshkent arxitektura-qurilish universiteti Arxitektura fakulteti dekani, PhD Azamat Xasanov Malayziya Islom Ilmiy Universitetida (USIM) bo‘lib o‘tayotgan “International Conference on Science, Built Environment & Engineering (ICOSBEE 2025)” xalqaro ilmiy anjumanida bosh ma’ruzachi (Keynote Speaker) sifatida ishtirok etmoqda.

Professor A.O. Xasanov anjumanda “Buyuk Ipak yo‘li xizmat ko‘rsatish infratuzilmasi: I.R. 5.0 davrida barqaror transport yo‘laklari uchun innovatsion yechimlar” mavzusida ma’ruza taqdim etmoqda.

Mazkur nufuzli anjuman ilm-fan, arxitektura va muhandislik sohalarida global miqyosda dolzarb masalalarni muhokama qilishga qaratilgan bo‘lib, unda dunyoning turli mamlakatlaridan yetakchi olim va mutaxassislar ishtirok etmoqda.

Professor A.O. Xasanovning ilmiy ma’ruzasi Buyuk Ipak yo‘li mintaqalarida transport-logistika infratuzilmasini rivojlantirish va barqaror yechimlarni ilgari surishda muhim nazariy va amaliy ahamiyat kasb etmoqda.

Ushbu ishtirok TAQU ilmiy salohiyatining xalqaro miqyosda tan olinayotganini ko‘rsatib, universitet olimlarining global ilmiy hamjamiyatdagi faol hamkorligini yanada mustahkamlashga xizmat qilmoqda.