Toshkent shahrida O‘zbekiston Respublikasi Bosh prokuraturasi hamda Toshkent arxitektura-qurilish universiteti o‘rtasida hamkorlik memorandumi imzolandi. Memorandum Bosh prokuror o‘rinbosari Samadov Salom Ismatovich va universitet rektori Tulaganov Bahrom Abdukabilovich tomonidan imzolandi. Memorandumning maqsadi — ta’lim, ilm-fan va amaliyot o‘rtasidagi integratsiyani ta’minlash, talabalarining huquqiy bilimlarini oshirish hamda qurilish va arxitektura sohasidagi ilmiy-amaliy hamkorlikni rivojlantirishdan iborat. Hamkorlik doirasida qo‘shma ta’lim dasturlari ishlab chiqiladi, “Qurilish huquqi” yo‘nalishida magistratura ochiladi, talabalar va o‘qituvchilar prokuratura organlari amaliyotiga jalb etiladi. Shuningdek, seminarlar, konferensiyalar va startap loyihalar tashkil etilishi, tarmoq korxonalari bilan hamkorlik yo‘lga qo‘yilishi rejalashtirilgan. Memorandum asosida har yili yo‘l xaritalari qabul qilinadi, stajirovka dasturlari tashkil etiladi hamda tashqi hamkorlar jalb qilinishi mumkin. Tomonlar maxfiy ma’lumotlarni himoya qilish va ularni uchinchi shaxslarga oshkor etmaslik bo‘yicha kelishuvga erishdilar.